SUAL VƏ CAVAB
- Sual: Mənim BPKİYİ-da aldığım sertifikat itib. Nə etməliyəm? Cavab: TİPİİ-yə rəsmi şəkildə ərizə ilə müraciət edirsiniz. BPKİYİ-nin təşkil etdiyi müvafiq təlim kursunda iştirakınız və sertifikatın verilib-verilməməsi haqqında məlumat institutun arxivində yoxlanılır. Bunların əsasında Sizə itirdiyiniz sertifikatın həqiqiliyini təsdiq edən arayış verilir.
- Sual: 2008-2015-ci illərdə aldığım Kurikulum sertifikatı itib. Nə etməliyəm? Cavab: Bu cür hallarda kurikulumun tədrisi üzrə təlim kursunu təşkil edən əlavə təhsil müəssisəninə müraciət etməlisiniz.
- Sual: 2016-2017-ci illərdə aldığım sertifikat itib. Nə etməliyəm? Cavab: Bu cür hallarda TİPİİ-yə müvafiq məzmunlu ərizə ilə müraciət edirsiniz. TİPİİ tərəfindən təşkil edilən təlim iştirakçılarının yekun qiymətləndirilməsi bazasında təlimlərdə və qiymətləndirmədə iştirakınız və sertifikatın verib-verilməməsi yoxlanılır. Bunların əsasında Sizə itirdiyiniz sertifikatın həqiqiliyini təsdiq edən arayış verilir.
- Sual: Fənn müəllimləri üçün ixtisasartırma təlimləri nə vaxt olacaq? Cavab: Ali və əlavə təhsil müəssisələri müxtəlif ixtisasartırma proqramları əsasında təlimlər təşkil edir. Təlimlər dövlət vəsaiti hesabına və ödənişli olmaqla iki istiqamətdə həyata keçirilir. Dövlət vəsaiti hesabna olan təlim proqramları tenderə çıxarılır, tenderdə qazanan ali və ya əlavə təhsil müəssisələri yerli təhsil şöbələrinin təqdim etdiyi siyahı əsasında müəllimləri təlimə dəvət edirlər. Ödənişli əsaslarla təşkil edilən müvafiq ixtisasartırma proqramlarına təhsil işçiləri öz təşəbbüsü ilə müraciət edir. Bu barədə məlumatı müxtəlif internet saytlardan, sosial şəbəkələrdən (facebook və s.) almaq olar.
- Sual: Uzun müddət işləməmişəm. Bərpa kursları varmı? Cavab: Müəllimliyə qəbul imtahan vasitəsilə aparıldığı üçün bərpa kursları öz əhəmiyyətini itirib. Uzun müddət işləməyənlər Təhsil Nazirliyinin keçirdiyi müəllimliyə qəbul imtahanında iştitak edərək imrtahan nəticələri müəyyən olunmuş səviyyəyə uyğun gəldikdə vakansiya elan olunmuş məktəblərə yerləşdirilirlər.
- Sual: MİQ-lə işə qəbul olunmuş yeni müəllimlər məktəbə kurikulum sertifikatı təqdim etməlidirlərmi? Cavab: Müəllimliyə qəbul imtahanında kurikulum üzrə sualları cavablandıraraq müvafiq bal toplamış müəllimlər fənn kurikulumları üzrə tədrisin metodikası ilə tanış olduqlarına görə belə bir sertifikatı tələb etməyə ehtiyac yoxdur.
- Sual: İnstitutda işləmək imkanları və s. Cavab: TİPİİ-də işləmək üçün ali pedaqoji təhsil tələb olunur. Magistratura və ya doktarantura təhsili arzuolunandır. Bir və ya daha çox xarici dildə yazılı və şifahi nitq bacarıqlarına malik olmaq lazımdır. Təhsil siyasəti və müəllim hazırlığına aid sualları əhatə edən test imtahanı və müsahibə aparılır. Bu mərhələləri uğurla keçən namizəd müvafiq vakansiya olduğu təqdirdə işlə təmin olunur.